أسبــوع السينما ..

من عشاق السينما والأفلام الإجنبية .. وكانت عطله سعيدة نوعاً ما .. الوقت اللي أكون فاضية فيه .. لازم تلاقوني بالسينما ..




وبما انه من قواعد منزلنا الحبيب .. ممنوع السينما الا مع واحد من الشباب ( أقصد أخواني ) الا اني عانيت عشان انسق بين وقتهم ووقت الأفلام اللي ابيها ..



بس بالبدايه ما توفقت مع هالفيلم المصري

خاني الوقت وما لقيت مناسب غيره , مع اني امقت الأفلام المصرية جملة وتفصيل , الا اني اضطريت ادخله عشان أخواني الاثنين بنت وولد كانوا يبونه , وتعرفون عرفت لازم اضحي بوقتي الثمين عشانهم , وقلت بعد معزومة حلاته التزم الصمت .

ندمت ندمت ندمت ..

وأكثر شيء ع وقتي ..

كان يدور الفلم حول 3 قضايا رئيسية .. ( الدعاره , تجارة المخدرات , التطرف الديني وياريت ناقشوها بصور جديدة نفس الصور اللي كل الافلام من 50 سنه اطرحتها , ودخلت الفيلم وطلعت ولا طعم ولا ذوق ولا عبر مستفاده .. ابي لو عبره مغبره ماكو .





والشيء اللي يضايق تذرعوا بذريعة الفقر ووضع السبب الأساسي وراء المثلث الفاشل ,

يعني حتى نجيب محفوظ واللي ناقشت رواية بالادراج السابق كان عنده صور للفقر اجدد

من هالفيلم اللي انتج 2009 ..

Yale shame





انكمل ..




وبعد صدمت الفيلم المصري أعلنت لاشقائي اني ما استمتعت وابي ادخل فيلم ثاني وكان

بعدها بيوم تغذيت ببافلوز ودخلت فيلم جاكي شان

للأسف كان اختياري , البطوله للملياردير جاكي شان واللي افترضت لما الفيلم حظى

بتمويلة وانتاجة يطلع غير .. لكن خسارة وقتي بعد ضاع , لما لعب دور الطيب الساذج

اللي يضحي عشان ابناء جاليته الصينيه وتدور الاحداث في اليابان اللي هاجروا لها نتيجه

تطورها مع اني ما شفت الجزء المتطور في الخرابة اللي صورها فيها , يعني اظهروا

الجانب الكلامي لتطور اليابان , مجرد ايعازات شكلية مثل عشان يقبضون ع المهاجرين

الغير شرعيين مثل الصينيين لازم يدورون في المجاري لان اليابانيين راقيين لدرجه ما في

شخص ياباني يقبل ينظف المجاري ومثل اليابانيين لا يسرقون .

يعني كانت بدايه مشوقه مع نهاية دموية اسخف من السخافه , ما ادري لكن اذا استمر جاكي

شان في انتاج وتمثيل مثل هالافلام رح يفقد شعبية الواسعة اللي تعب عليها قبل المليارات .

نسيت اقول ان لغة الفيلم الانجليزية الركيكة اللي ما تعب عمرك وتستعين بالترجمه عشان

تفهم .

ختامها مسك ..

اهوا الفيلم اللي عوضني عن السخافة اللي شفتها ( شارلوك هولمز ) نسبة الى بطلة شارلوك

هولمز المحقق العبقري وبطل الروايات ومساعدة تومسون الدكتور والصديق طبعا هولمز

شخصية خيالية لمحقق غير عادي ظهر في بداية القرن العشرين على يد الطبيب الروائي

آثر دويل , اجمل ما في الفيلم انه ما شوه هالشخصية الأسطورية بل اعاد احيائها باحسن

صوره ممكنه .

كانت لغة الفيلم الإنجليزيه البريطانية الأحداث وقعت في انجلترا , البطل اللي لعب دور

هولمز اهو Robert Downey Jr

وكان جيد جداً وأدى الشخصية بكل اجادة حتى انه حببنا فيها , ومساعدة تومسون لعب دوره

الوسيم جدا Jude Law الفيلم كان تقيمة عندي ممتاز حتى اني شفته مرتين طبعا انا ما

احب اعيد الفيلم حتى وان عجبني بس هذا استثنائي , حبيت حل للقضية اللود بلاكوورد اللي

تعمد انه يخدع الكل ويوهمهم انه يستخدم السحر الأسود بينما كان يتستخدم خدع علمية

مبتكرة كان هولمزالوحيد الذي اكتشفها .

جد ممتع هالفيلم , ولأول مرة ما يضيع وقتي خلال اسبوع السينما واستمتعت جدا .

تحذير الفيلمين الصيني والمصري يضر بالذوق العام .

اتمنى لكم اسابيع ممتعة وتشوفون افلام ممتعة ومسليه وبعيد عن الاسفاف الموجود ..

( ع فكرا الادراج هذا اخذ مني طابع العاميه في الطرح حيث اني لم اجد موسوعه لغويه

تسع التحلطم كثر العامية )

كل الحب ..

ebtsamh