تحليلي .. ورسوم الأطفال ..

عرف عنه انه اسلوب علاجي لأمراض الاطفال , وسيلة تعبير صحية تساعد على التخلص
من الانفعالات السلبيه منها والايجابية , وسيلة للتواصل ممتازة وفعالة مع الاطفال .

أنها رسومات الاطفال ..

من أكثر الاساليب فاعلية وذكاء .. ايضاً ما تحتاج طفل عبقري اقل خربشات لها معاني
نفسيه وتعبر عن الطفل .

وايضاً تفرح الأطفال بشكل كبير يعني ممكن تعدي الساعات والطفل امام كراسته يلون ويرسم
دون ادنى احساس بالتعب ..

درست وقرأت كثيراً بمواد تحليل رسومات أطفال .. حتى انها كانت مادة دراسيه أخذتها بالجامعة
وكان مقرر اني احلل 10 لوحات بتحليل نفسي دقيق حتى انجح فيها ..

وكانت من امتع المواد اللي اخذتها بحياتي .. أقبلت بشدة على التحليل حتى اني كنت اجمع اولاد
الجيران والأهل والشارع نسوي ورشه فنية , كانوا اهلهم يدعولي عشان اريحهم من اولادهم
والاولاد يشوفوني ملاك الرحمه المنزل على هيئة بشر .

ادلعهم واشغلهم ميوزك هادئه لبيتوفن او باخ .. طبعا مو فاهمينها ولا حتى اتخيل يفهمونها
بس تاثر على الجو العام للمكان .

في نهاية اليوم السعيد اكون مطلعه في اولاد الناس علل مو موجوده بقاموس الطب النفسي
اقولهم شلون اهل الاطفال يعاملون اولادهم لانه كله يكون واضح من خلال خيال الطفل
وادراكه للاشياء .. وينعكس على اقل اخط او لونه يرسمه
ولذلك اخوي منع اني اطلع على رسومات عياله .. ههههه

من يومين بس .. شفت ورقه عاديه ترقص جدامي .. طرت من الفرحه لما اكتشفت انها لولد
اخوي الصغير تمعني باللوحة خلاني اخذ فكرة عامة عن حياته بس بنطره اهو .

طبعا علنية التحليل امامكم ..

هذي اللوحة لطفل بعمر الست سنوات .. حتى لو ما كنت اعرف عمره ( رغم اني اعرف )
رح يبين من المرحله المصنفه منها رسوماته وهى مرحلة تحضير المدرك الشكلي
التي يتسمون فيها اطفال ما بين الاربع الى 7 سنوات .

طبعا هالمرحله ذاتية واقعيه من حيث الرسوم يعني رسوماته من واقع خبرته وما يحدث امامه
مثل ما انتو شايفين ..

فيها ظاهرة تقزيم لبقية العناصر وتضخيم لعنصر واحد عبر فيها عن ذاته ..
صراحه أكتشفت وجود مشكله عنده .. ألا وهي انه وحيد بالمدرسة ما عنده اصدقاء
تجلى هذا التفسير من خلال رسمة لعنصر عبر فيه عن ذاته واعطاه طابع حزين ووحيد
مختلف عن بقيه العناصر اللي قزمها يقصد فيها زملائه في المدرسة والتقزيم كناية عن عدم
اهتمام مقارنه بذاته التي ضخمها في اللوحة .

وممكن جدا أن تفسر تفسير انفعاليته على أقرانه تتمثل بنظره سلبيه تجاهم لذلك صغر حجهم
كنايه عن شعوره وانفعاله ..

تجلت هناك ظاهره ايدي الاطفال الاخرى تعبر عن صور مختلفه مثل الطفلان في الاعلى
رسمهم الطفل متشابكين اليدين كنايه عن صداقتهم القوية نسبيا خاصه في نظر الطفل , اما الطفلين
اقصى اليمين تم رسم اطرافهم اكثر من ناحيه تعبر للرائي بقيامهم باللعب .. وهذي صور مرت علية
بواقعه وكانت غير محببه انه ما يكون عنصر مشارك فيها الامر اللي ادى انه يكون حزين في تعبيره
عن ذاته .

نقطة جليا احب اوضحها الطفل رسم شعره والكرافه لبسهم اليونيفورم مال المدرسه هالنقطة دلتني
على ان مكان المشكله رغم انها واضحه جدا انها بالمدرسه .

فيه ايضا الطفل في الاسفل طفل صحيح انه وحيد ولكنه فرح ومستمتع بوقته رسمة قربه الشخصية التي
عبر فيها عن ذاته كنايه عن المقارنه بين الاثنين , فالطفل يرى حاله مقيد .

اعزي هالنقطه لعمل والدته معه في نفس المدرسه التي يتعلم فيها يمكن وجودها مقيد تصرفاته ومو مخليه
ياخذ راحته ويكون على سجيته مع اقرانه .

طبعا بعد هالتحليل .. للوحه بسيطه كانت امامي انصدمت اني اكتشفت مشكله يعاني منها ولد اخوي ..
وطرحتها على مجلس الادراه تبع العائله الكريمة .

واتمنى من كل قلبي تنحل مشكلته .. برغم من انه ما اشتكى بس عبر برسوماته .

انصحكم بشدة بهالطريقه في التعامل مع أطفالكم خاصه انهم يواجهون صعوبه في التعبير عن ذواتهم
في سنون صغيره نسبياً , هالطريقه فعاله ويستخدمونها الغرب بشكل كبير جدا في التعامل مع اطفالهم
ومن يعانون من صعوبه التواصل معاهم ..

أتمنى فادكم الموضوع .. وتقبلوا مني كل حب ..

EBTSAMH